Кои средства се најдобри за чистење на штофот во автомобилот

Германскиот институт за техничка контрола изврши тестирање на десет производи за чистење на штофот на седиштата. Според резултатите, не мора секогаш да се посегнува по најскапите производи.

Времето е тоа што најмалку ни стои на располагање во денешницата. Многумина го користат автомобилот како ресторан за брза храна, но во сета таа итаница, како по некое правило секогаш ќе се случи врз седиштата да се истури кечапот или кафето. Добро е ако тоа може веднаш да се избрише со средство за чистење на штофот, за малото невнимание да не се претвори во трајна дамка што предизвикува непријатност при секое седнување во возилото.

Германскиот институт за техничка контрола, заедно со магазинот Auto Zeitung, тестираше десет производи. Победник е средството за чистење со активна пена од производителот Nigrin, кое со цената од 6,70 евра во германската продажна мрежа, за количина од половина литар, дури е и поевтино од некои други производи на тестот. Препорака доби и двојно поскапиот производ за чистење на кабината од Clean Extreme, по когошто следат активната пена за чистење од Armor All Universal, средството за чистење штоф и кабина од Kim Tec, пената од Sonax, средството за чистење штоф и алкантара исто така од Sonax, пената Dr. Wack A1, Mannol 9931 и средството за штоф од Caramba. Интересно е што вториот производ од победникот Nigrin, средството за нега и чистење текстил од серијата Performance, на тестирањето доби само слаба препорака.

Таквиот резултат воопшто не треба да зачудува, затоа што на тестирањето се постапуваше точно според упатството на производот. Постапката што е опишана во упатството за овој производ на Nigrin наведува дека средството треба прво да се испрска, да дејствува 30 секунди, да се втрие со грубата четка што се испорачува со производот, да се суши еден час и на крај да се исчетка или да се вшмука. Подобри резултати ќе следуваа доколку производителот препорачаше поинтензивно триење на штофот со крпа или сунѓер, но вака се постигнува само половичен ефект, затоа што производителот очигледно сакал да му ја олесни работата на корисникот.

Се оценуваа четири категории: Нанесување, чистење, подносливост со материјалот и цената. Дополнителни бодови добија четките што следуваат бесплатно со производите на Mannol и Nigrin Performance. Нанесувањето се оценуваше според информациите во упатството за користење, дозирањето и размачкувањето на производите, како и потребната количина и миризбата. Повеќето производи добија солидни оцени во оваа категорија, вклучувајќи ја и подносливоста со различни материјали. На тестот се проверуваше дали средствата оставаат рабови или остатоци врз површината, дали ја менуваат бојата на материјалот или дали ја оштетуваат површината на штофот.

Секако дека најмногу бодови се доделуваа за ефикасноста. Целта беше велур со долги влакна и едноставен мазен штоф да се ослободат од релативно незгодните дамки – сенф, кечап, кока-кола измешана со сок од портокал, чоколада и макијато. Но, требаше да се исчистат и дамки од пенкало и фломастер, маст за подмачкување и 5-процентен раствор на сол. Пред тестирањето, дамките беа оставени да се сушат 18 часови на 40 степени Целзиусови.

Изненадува тоа што повеќето средства лесно и без мака ги отстранија дамките од кока-кола и макијато, исто како и солениот раствор, сличен на уличната нечистотија при зимското прскање со сол. Добри шанси има и за отстранување на исушен кечап и чоколада, но не и за сенг. Фломастер, пенкало и маст оставаат тврдокорни траги, при чие што отстранување може дури и да се оштети материјалот на седиштата.

Препорака е дамките да се исчистат додека уште се свежи, затоа што колку помалку време се остава да дејствуваат кафето, кечапот или снефот, толку е поголема шансата да нивно отстранување со средство за чистење.

Резултатите од тестирањето: