Побуната на традиционалистите за воведувањето на семејниот ван во понудата на BMW сега добива и официјална потврда. По инерција, Баварците го нудат спортскиот пакет М за Active Tourer. Комично.
Некои модели е најдобро да останат тоа што се. Семејниот ван треба да остане семеен ван, без спортски претензии. Уште не стивнале реакциите на ентузијастите на марката за преоѓањето на преден погон, за новата генерација трицилиндарски мотори и за воведувањето ван во понудата, а BMW веќе го прави следниот грев: Спортски пакет со светиот знак на M GmbH во Active Tourer!
Замислете ја следнава ситуација во семејниот ван Active Tourer: Мажот ги лови свијоците на граница на стабилноста, додека сопругата плете спокојно на совозачкото седиште, а децата играат јамб на задната клупа. Не оди, нели? Постоењето на можноста ванот да се опреми со пакетот M помалку ќе ги иритира идните сопственици на моделот, отколку оние што тераат роден динамичар на марката, на кого што му доликува дополнително надградување на возните својства.
Сигурно знаат подобро во BMW. Од ноември ќе биде достапен спортскиот пакет М со спојлери, спортски дотерано подвозје, вклучувајќи динамична програма за приспособливата амортизација и бандажи од 17 или 18 инчи во стилот на M GmbH, како и со спортски волан, алуминиумски прагови и педали, хромиран издув и спортски седишта, од кои последниве ја имаат специфичната мустра за „спортската подмарка“ на BMW.