Дарко Јаконов
Пребрзото возење по швајцарските патишта се санкционира драстично. Возењето во град за 50 km/h побрзо од дозволеното може да повлече и до четиригодишна затворска казна.
Со програмата ViaSicura што стапи на сила уште на 1-ви јануари 2013 година, Швајцарците воведоа ригорозни казни за возачите со цел да се подобри безбедноста во сообраќајот. Според оваа програма, пребрзото возење се смета како сериозен кривичен прекршок, за кого што единствено во Швајцарија може да се „заработи“ затворска казна во траење од една до четири години.
Како пребрзо возење се смета ако брзината во зони со ограничување на 30 km/h се пречекори за најмалку 40 km/h, ако во град се вози 50 km/h над дозволеното, на регионални патишта 60 km/h и на автопат 80 кm/h над ограничувањето. Доколку пречекорувањето е значително над дозволеното, дополнително следува и судска постапка за одземање на возилото. Затворската казна не може да се одлежи надвор од Швајцарија, но во случај судските органи да донесат пресуда, за обвинетото лице се распишува налог за притвор при негово враќање во земјата.
