Две легенди на Volkswagen Golf GTI на патеката Портимао

Наскоро стартува испораката на специјалната серија Golf GTI Clubsport со којашто се одбележува 40-от роденден на спортската икона. За таа цел, Volkswagen ги соочи двата јубилејни модела со 112 и 265 КС на тркачката патека во Португалија.

Volkswagen ја избра тркачката патека Портимао на југот на Португалија како совршено место за соочување на две легенди. Pirelli Golf во 1983 година со својот 1,8-литарски мотор со 112 КС го претставуваше тогашниот врв во техниката во компакт класата и беше понуден во ограничена серија кусо пред завршетокот на производството на првата генерација на Golf. Како негов пандан, в година пристига Golf GTI Clubsport, точно за одбележувањето на 40-от роденден на Golf GTI. Неговиот дволитарски мотор TSI во нормален режим располага со 265 КС и со вртежен момент од 350 њутнметри. Но, има еден важен технички детал.

Кога педалот за гас ќе се притисне до крај, моторот во последниот јубилеен модел на GTI вклучува привремена буст-функција, односно во времетраење до 10 секунди ослободува моќност од 290 КС и вртежен момент од 380 њутнметри. Резултатот од тоа е забрзување до 100 за 5,9 секунди, што прави овој автомобил да биде најсилен сериски GTI на сите времиња. Во верзијата со менувач со двојна спојка, GTI Clubsport располага дополнително со „Launch-Control“, којашто овозможува контролирано забрзување од место со максимална моќ.

Освен во турбонатполнењето, Volkswagen изврши неколку зафати и во дизајнот, со цел за натамошно оптимирање на аеродинамиката. За поголем потисок врз предната оска се грижи нов преден браник, додека за контрола на вртложењето на воздушните струи зад каросеријата се грижат впечатлив заден спојлер и дифузор во браникот. Купувачите на Golf GTI Clubsport можат посебно да нарачаат и полу-слик гуми, кои што се одобрени за возење и по нормални патишта.

Volkswagen се погрижи и за ергономијата, со можноста за избор на спортски школкасти седишта или класични спортски седишта на GTI. Покрај тоа, каросеријата на Golf GTI Clubsport стандардно се испорачува во две бои.

Golf GTI Clubsport и Golf GTI Pirelli се само две од специјалните серии во историјата на моделот. Марката ги одбележа и 20-от, 25-от, 30-от и 35-от роденден на својата спортска икона со специјални серии. Секако дека ексклузивноста подразбира и соодветна цена. Clubsport во Германија ќе се продава по цена од 34.500 евра.