Дарко Јаконов
Поради грешка во софтверот постои можност од целосно откажување на електрониката кај Boeing 787 Dreamliner. Проблемот се решава исто како кај домашниот компјутер, со ресетирање.
„Дали го ресетиравте компјутерот?“ Така гласел советот што пилотскиот екипаж го добил од службата за техничка поддршка на компанијата, за решавање на опасните технички проблеми на патничкиот авион од типот Boeing 787 Dreamliner. Според предупредувањето издадено од американската служба за надзор на авиосообраќајот, софтверската грешка може да предизвика целосно откажување на електрониката во авионот и губење на контролата од пилотите.
Boeing го открил пропустот при лабораториските испитувања. Тој автоматски ги става генераторите на Dreamliner во таканаречен модус Fail-Safe на секои 248 денови, поради преоптоварување на интерната меморија. Генераторите се исклучуваат заради спречување на натамошни штети во случај на дефект. Доколку сите генератори во авионот стартуваат истовремено, тие и ќе откажат истовремено. Во тој случај се вклучува турбина за помошно снабдување со електрична струја, но додека оваа турбина проработи, енергијата се испорачува од батеријата во авионот. За тоа време, функционирањето на некои хидраулични делови е ограничено и може да предизвика опасна ситуација доколку проблемот се случи прио слетување или полетување.
Решението на проблемот е многу едноставно. Системот мора редовно да се ресетира. Според евиденцијата на Boeing, сите авиони Dreamliner што се наоѓаат во сообраќај, редовно се ресетираат како дел од рутинското сервисирање. Boeing неодамна започна да им препорачува на своите клиенти да го ресетираат системот на секои четири месеци. Со тоа се избегнува опасноста од снемување струја во авионите. Производителот моментно работи на отстранување на проблемот.
