Дарко Јаконов
Според едно меѓународно истражување, „автонацијата“ ја задржува превласта и во производството на електрични автомобили. Во продажбата и во производствените капацитети сепак предводат други.
Германија ја поврати технолошпката превласт во погонот на струја. Новата генерација на технички напредни модели, како BMW i3 и Volkswagen Golf GTE, ги потисна претходно владејачките корејски производители во третиот квартал, покажува истражувањето на експертите од консултантската компанија „Рудолф Бергер“. Корејците за прв пат успеаја да воспостават целосно сериско производство, но во поглед на техничкиот капацитет остануваат зад очекувањата. Според експертите, Јапонија е на третото место, пред Франција, Кина, САД и Италија.
Додека технологијата на напредните автомобили со погон на струја и со хибриден погон со надворешно полнење им го обезбедува водечкото место на Германците, тие заостануваат во другите аспекти, а особено во продажбата на овие возила. Според студијата, Германија е само на четвртото место меѓу водечките пазари за новата техника. Првите три места ги делат Франција, Јапонија и САД. Француските производители на автомобили веќе со години се посветени во погонот на струја и соодветно на тоа имаат постигнато учество на овие автомобили од 0,79 проценти во вкупниот пазар, што е највисоко учество во светски рамки. Јапонија и САД земаат силен залет и во последните дванаесет месеци ја зголемија продажбата на електромобили и плаг-ин хибриди за околу 20 проценти.
Како производствена локација за новата техника предводат САД и Јапонија, со очекуван производствен волумен од 450.000 возила до 2016 година. Масовното производство на батерии им обезбедува висок пласман на Кина и на Јужна Кореја. На петтото место е Германија, со мала предност пред Франција, додека последна е Италија.
