Според последните пазарни истражувања, низ светот во моментов возат 1,3 милион автомобили со погон на струја. Само лани се продадени над половина милион возила. Светски лидер и натаму е Норвешка.
Погонот на струја напредува со силно темпо. Според последните податоци, во светот моментно се возат 1,3 милион автомобили со погон на струја, што е речиси двојно зголемување за период од една година. Вкупно 550.000 електрични и плагин-хибриди се продадени на глобално ниво лани, од кои најголемиот број, над 200.000 примероци, припаѓа на кинескиот пазар. Со најголем возен парк од електромобили и натаму располагаат САД, каде што се регистрирани 410.000 вакви возила. Меѓу најголемите пазари се вбројуваат и Јапонија, Холандија, Норвешка и Франција. Во поглед на уделот на електрични возила во вкупниот возен парк, светски лидер и натаму е Норвешка, кадешто дури три проценти од 2,64 милиони возила во земјата имаат погон на струја. Секој петти нов автомобил во ланската продажба во скандинавската земја бил електричен автомобил.
Од моделите, најпродаван лани бил Tesla Model S со 42.730 примероци, пред плагин-хибридот Mitsubishi Outlander PHEV со 41.080 и Nissan Leaf со 40.270 примероци. За првпат меѓу водечките модели се појавува и автомобил од кинеска продукција, BYD Qin, со 31.900 продадени примероци лани.
Во статистиката влегуваат само патнички автомобили со електричен или плагин-хибриден погон, не вклучувајќи товарни возила и автобуси или автомобили со обичен хибриден погон.
Вкупно регистрирани примероци по модели:
Модел | 2011 г. | 2012 г. | 2013 г. | 2014 г. | 2015 г. |
Nissan Leaf | 21.670 | 47.400 | 94.620 | 152.990 | 193.260 |
Tesla Model S | 0 | 2.500 | 25.210 | 54.110 | 96.840 |
Chevrolet Volt | 8.280 | 33.370 | 58.210 | 78.560 | 95.420 |
Mitsubishi Outlander PHEV | 0 | 0 | 18.050 | 46.690 | 87.780 |
Toyota Prius PHEV | 2.970 | 25.360 | 44.800 | 63.640 | 69.880 |
BYD Qin PHEV | 0 | 0 | 0 | 14.750 | 46.650 |
BMW i3 | 0 | 0 | 920 | 14.500 | 36.550 |