Дарко Јаконов
На купувачите на кои C 63 како вистински модел од AMG им е премногу лут, Mercedes ќе им го понуди C 43 со битурбо натполнење и погон на сите тркала. Со 367 КС, и тој е опасен залак за каснување.
Заедно со светската премиера на кабриолетот од класата C, Mercedes за салонот во Женева подготвува и „блага“ верзија на AMG, во форма на C 43 4Matic Coupe. Трилитарскиот мотор V6 со битурбонатполнење ослободува 367 КС и тоа е солидна дополнителна доза сила во споредба со C 400 со стандардната верзија на овој мотор. Покрај дополнителните коњски сили, C 43 доаѓа и во комбинација со деветстепен автоматик и погон на сите тркала 4Matic.
Вртежен момент од 520 њутнметри се испорачува континуирано во подрачјето меѓу 2.000 и 4.000 вртежи. Исто како останатите верзии од AMG, C 43 во стандардни услови го распределува овој вртежен момент во сооднос 31:69, односно со нагласок на задниот погон и во интерес на динамиката во возењето. Спринтот до 100 километри на час со C 43 трае 4,7 секунди, а крајната брзина е џентлменски ограничена на 250 km/h.
Според Тобијас Мерс, шеф на одделението AMG, новиот C 43 4Matic Coupe е „следното скалило во нашата стратегија за развој.“ Идејата со моделите од „серијата 43“ е во неа да се пренесат карактеристичните гени на AMG, истите како во GT или во моделите „63“, но во сегмент што е малку поблиску до купувачите.
Исто како кај големиот брат C 63, возачот може да избира неколку програми за возење, коишто влијаат соодветно врз електрониката на моторот, приспособливата амортизација, стратегијата на промена на степените на пренос и врз управувањето. За „послабиот“ модел да не се приближува со изгледот до екстремниот C 63, браниците и сопирачките дискови зад бандажите од 18 инчи се малку поумерени. Стандардно за AMG, спортските седишта се обложени со вештачка кожа и со штепови во црвена боја, а и безбедносните ремени се во истата боја.
