Јапонската марка денес ги објави резултатите од продажбата не европскиот пазар за минатиот месец. Интересна е бројката за продажбата на електричниот автомобил Leaf.
Продолжувајќи во насока на постигнување на целта, Nissan да стане најпродавана азиска марка на европскиот пазар, јапонскиот производител во септември продаде 68.753 возила во Европа, наспроти 66.303 возила во ланскиот септември. Со оваа продажба, Nissan покрива мошне задоволителни 4 проценти од пазарот. Не е изненадување дека кросоверите Qashqai и Juke остануваат најпродавани модели на Nissan на стариот континент. Солидна е бројката за најпродаваниот електричен автомобил на сите времиња, Leaf. Електромобилот на Nissan во септември се продал во 1.986 примероци, што е само половина помалку во споредба со продажбата, на пример, на класичниот модел Almera.
Најголем единечен пазар во Европа за Nissan е Велика Британија, со 21.723 возила во септември, пред Русија (13.003), Франција (6.904), Германија (6.621) и Италија (4.466). Меѓу моделите предводи Qashqai со 20.644 возила во септември, пред Juke (12.473), Note (7.536), Micra (7.410) и Almera (3.244 возила).