140
20 shares, 140 points

Услугите се новиот бизнис на производителите на автомобили. Марката smart испробува како пазарот ќе реагира на можноста за достава на пошта во багажникот на автомобилот.

Логистиката е зборот што им го отвора апетитот на производителите на автомобили. Тие ги користат моќта и имиџот за да понудат нови или видоизменети услуги на пазарот. Марката со малечките автомобили на Daimler започна пилот-проект за достава на пошта во багажникот. Проектот се одвива во неколку германски градови, во соработка со локална служба за достава.

Сопственикот на возилото може да ги нарачува речиси сите производи од секоја продавница. По нарачката, тој го одредува местото и времето за достава на пратката. По успешниот старт во Штутгарт лани, услугата моментно е достапна и во Келн, Бон, Берлин и Хамбург. Досега се извршени над илјада испораки. Услугата е бесплатна, секако под услов да се поседува smart.

Целата постапка се одвива преку мобилна апликација

При нарачката преку интернет, клиентот ја наведува „адресата“ на својот smart. Кога пакетот ќе присигне во магацинот на службата за достава, тој добива известување на телефонот. Преостанува уште да се постави датумот и периодот од денот, како и локацијата на возилото.

Во следниот чекор, корисникот генерира овластување за пристап без клуч, за поштарот да ја остави пратката во возилото. Багажникот може да се отвори само еднаш и само во зоната што сопственикот ја одредил претходно. За услугата да биде достапна, возилото мора да поседува „конективити-бокс“.

По испораката, багажникот повторно се заклучува дигитално. Сопственикот на smart добива известување дека доставата е извршена успешно.


Ти се допаѓа? Сподели со пријателите!

140
20 shares, 140 points
Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

0 Comments

Вашата адреса за е-пошта нема да биде објавена. Задолжителните полиња се означени со *