Совети

Патување со автомобил ноќе не е најдобар избор

Застои, стрес, преполни паркиралишта, па уште и жешко под покривот. Патувањето со автомобил на годишен одмор честопати знае да биде напорно. Некои возачи решаваат да патуваат ноќе. Но, тоа не е најдобро за здравјето.

Подготовката за патување со автомобил на годишен одмор не подразбира само проверка на притисокот во гумите, на нивото на масло и на сопирачките облоги. Возачот, пред сé, треба да се подготви за долгото патување.

Тоа почнува со правилен оброк. Правило е на патување со автомобил да не се поаѓа со празен стомак. Обичен појадок го раздвижува крвотокот. Треба да се внимава на тоа дека преголема количина пијалоци што содржат кофеин ја поттикнува нервозата.

Возачите треба да избегнуваат и обилен оброк пред поаѓањето на пат. Тоа предизвикува замор. Најдобро е да се јаде ситно сечена сурова храна, како морков, краставица или јаболко. Оваа храна може да се понесе и на пат, затоа што обезбедува течност и заситува.

Како да го подготвите автомобилот за летниот одмор

Облеката исто така е важна. Таа треба да биде удобна и лесна, да не се припива на телото. За децата се препорачуваат долги тенки маици и пантолони. Кога температурите се високи, децата може да добијат изгореници на зовриените седишта или други делови во кабината. Возењето со влечки, кломпи и слично, не е забрането, но не е најбезбедно. Правилен избор се тенки спортски обувки со врзување.

Изборот да се патува ноќе се чини дека носи само предности. Сообраќајот е намален, колоните не се долги и во најдобар случај се заштедува цел ден од летниот одмор. Возачите што редовно земаат лекарства сепак треба да бидат крајно внимателни. Повеќето лекарства предизвикуваат замор. Тоа најчесто не се забележува во секојдневието, затоа што овие лекарства обично се земаат навечер пред заспивање.

Внимателно при патување со автомобил под дејство на лекарства

Но, кога треба да се патува, овие редовно земани лекарства претставуваат опасност. Тоа важи особено за лековите против силни болки, средства за намалување на крвниот притисок или психофарматици. Генерално, голем број лекарства може да влијаат врз безбедноста во возењето. На пример, некои препарати за очите предизвикуваат ширење на зениците што може да води кон посилно заслепување во текот на приквечерината и ноќта. При зголемена температура исто така не треба да се седнува зад волан.

Патниците со венски воспаленија треба превентивно да носат компресивни чорапи или да земат средство за разретчување на крвта, заради намалување на опасноста од тромбоза. Редовната починка за време на патувањето е најдобар начин за спречување на застојот во крвотокот во нозете.

Патување без мачнина

Препорачливо е на секои еден и половина до два часа да се направи пауза. Најважно е движењето. Паузата им годи на нозете, но движењето генерално помага да се внесе кислород во телото. На подобро организираните одморалишта обично се наоѓаат средства за лесни вежби за раздвижување, исто како и игралишта за децата.

Кога ќе се мине подолга релација и возачот чувствува замор и поспаност, раздвижувањето најмалку помага. Тогаш конечно треба да се дремне и да се испие кафе. Истражувањата имаат докажано дека такачаренената турбо-дремка од околу половина час е најефикасна за организмот да се врати во форма. Барем на кусо.

Вака се изведува турбо-дремката, без да се западне во длабок сон. Седиштето се легнува, клучот се зема в рака, се заспива. Кога дланката ќе го испушти клучот, тоа е знак дека е достигната фазата на длабок сон, а возачот се буди од звукот на клучевите. Спротивно од убедувањето, кафето треба да се испие пред дремнувањето, затоа што кофеинот го ослободува дејството по околу половина час до 40 минути. Дотогаш, дејството на кафето е спротивно, односно поттикнува поспаност. Оттука, практиката на некои возачи да го пијат кафето додека возат, апсолутно е погрешна.

Ознаки
loading...

Слични објави

Напишете коментар

Вашата адреса за е-пошта нема да биде објавена. Задолжителните полиња се означени со *

Откриен е Adblock

Ќе ни помогнете доколку ја исклучите вашиата блокада за реклами