Дарко Јаконов
EQ – тоа се двете букви под коишто Mercedes ја претстави својата нова марка за електромобилност, чиешто име треба да асоцира на IQ, односно на „електрична интелигенција“. Како најава за новата автомобилска ера, на салонот во Париз е претставена студијата на спортски теренец под ознаката „Generation EQ“.
Благодарение на приспособливата архитектура на батериите, двата електромотора можат да достигнат моќност до 300 киловати, односно 408 КС, којашто се пренесува на патот преку погон на сите тркала. Максималниот вртежен момент достигнува 700 њутнметри. Со оваа моќност, Generation EQ забрзува до сто за помалку од пет секунди. Mercedes ветува досег до 500 километри.
Кокпитот ќе биде заеднички за сите модели во електричната марка на Mercedes и целосно е ослободен од класични прекинувачи и копчиња. Во двата краци на воланот се вградени сензорски полиња што реагираат на допир и самите се поставени во дисплеи од органски светлечки диоди OLED. Во зависност од менито, во овие дисплеи се прикажуваат соодветните икони и знаци. Преку допирање на дисплеите, возачот може да се движи низ различни менија и преку кусо притискање да го потврди изборот.
На широкоаголниот екран од течни кристали со приказ во висока резолуција и дијагонала од 24 инчи се прикажуваат сите важни информации за возењето, како брзината, досегот, патниот компјутер, како и навигациските карти. Возачот може сам да избира дали на екранот ќе се прикажуваат само најнеопходните информации заради оптимална прегледност, или на истиот ќе се прикажува целосниот обем на информации.
Камери место ретровизори, сензорски полиња место рачки во вратите
Место обични ретровизори, Generation EQ располага со камери за прикажување на сообраќајот зад возилото, коишто ја прикажуваат сликата на дисплеи вградени во вратите. Внатрешните рачки за отворање на вратите и прекинувачите за електриката на прозорците исто така се заменети со сензорски полиња на допир. Кабината со четири седишта е воедно изведена и со мошне промислена светлосна архитектура.
Дел од напредниот технолошки пакет во возилото е технологијата Car-to-X, за комуникација со патната инфраструктура и останатите возила, како и со навигациски систем базиран врз картите на Here, коишто Daimler ги откупи заедно со Audi и BMW.
[FAG id=25608]
