Дарко Јаконов
Жирито од новинари од 23 држави избра светски автомобил за оваа година да биде Mazda MX-5. Се гласаше и за најспортскиот, најлуксузниот, најеколошкиот и најдобро дизајнираниот автомобил во светот.
Титулата на светски автомобил за оваа година му припадна на родстерот Mazda MX-5. Тоа е завршницата од светскиот маратон кој започна со список од 23 нови модели, за потоа изборот да се сведе на десет и во финалето да се најдат само три модели: Audi A4, Mazda MX-5 и Mercedes-Benz GLC.
Жирито на изборот за светски автомобил на годината го сочинуваат 73 еминентни автомобилски новинари од 23 држави. Патот до светскиот автомобил започна на салонот во Франкфурт, продолжи на Лос Анџелес, за потоа на салонот во Женева да бидат објавени трите финалисти и сега на салонот во Њујорк да се прогласат победниците во петте категории на изборот.
Победата на родстерот е уште поубедлива со неговиот избор за најдобро дизајниран автомобил во светот. Mazda MX-5 во оваа категорија ги победи Jaguar XE и Mazda CX-3. Шестмина врвни дизајнери ги избираат трите финалисти, за кои потоа гласаат членовите од жирито. Во категоријата на најдобар спортски автомобил во светот учествуваа девет модели од првичната листа на кандидати. Тука победи Audi R8, пред Honda Civic Type-R и Mercedes-AMG C 63 Coupe.
Серијата 7 на BMW најмногу го убеди жирито во поглед на понудениот луксуз. Во оваа категорија, баварскиот знаменосец годинава се натпреваруваше во финалето со Audi Q7 и Volvo XC90. Победата во последната, но не и најмалку значајна категорија за најеколошки автомобил во светот, најоправдано ја заслужи автомобилот со погон на водород Toyota Mirai, каде што како противници во финалето му останаа Chevrolet Volt и Toyota Prius.
Ова се досегашните носители на титулата на светски автомобил на годината: Mercedes-Benz C-Class (2015), Audi A3 (2014), Volkswagen Golf (2013), Volkswagen Up! (2012), Nissan Leaf (2011), Volkswagen Polo (2010), Volkswagen Golf (2009), Mazda2 / Mazda Demio (2008), Lexus LS460 (2007), BMW серија 3 (2006) и Audi A6 (2005).
