Дарко Јаконов
Услугата што ја нуди Car2Go достигна 2,2 милиони корисници низ светот. Можноста автомобилите да се изнајмат на само десетина минути и да се паркираат бесплатно наидува на сé поголем интерес. Четиринаесет илјади автомобили на Car2Go им стојат на располагање на корисниците во осум држави и 25 градови низ светот. Ова е иднината на возењето низ град.
Најголемата светска компанија за „Carsharing“ или краткотрајно изнајмување возила лани достигна 2,2 милиони корисници. На секоја 1,4 секунда некаде низ светот се изнајмува по еден автомобил на Car2Go. Од 25-те градови во коишто е достапна оваа услуга, најголем број корисници има во Берлин, кој со 175.000 корисници е најголем град на Car2Go во светот.
Четиринаесетте илјади возила на Car2Go лани биле изнајмувани повеќе од 22 милиони пати. Само за една година Car2Go привлекол 96.000 нови корисници во Мадрид, по што следат Берлин со 47.000 нови клиенти и Ванкувер и Хамбург со по 26.000 нови клиенти.
Жителите и посетителите во големите светски градови сé поретко се решаваат да го користат сопствениот автомобил во градскиот метеж и посегнуваат по возилата на Car2Go и останатите компании од оваа бранша, коишто по користењето можат да ги остават бесплатно на кое било јавно паркиралиште. Покрај тоа, голем дел од возниот парк отпаѓа на верзиите на Smart со електричен погон, што на корисниците им овозможува да пристапат во еколошки заштитените зони во строгиот центар на градовите, кадешто не е дозволен пристап за возила со повисока емисија на штетни материи или мора да се плаќаат скапи давачки.
