Стартап-компанијата Sono Motors од баварската престолнина ги исполни ветувањата и синоќа го претстави евтиниот електричен автомобил Sono Sion, со досег од 250 километри и соларни ќелии на покривот. Со нив може да се „наполнат“ до 30 километри дневно. Цената е 16.000 евра.
Минхенската стартап-компанија Sono Motors синоќа ја одржа премиерата на својот соларен-електричен автомобил Sion. Настанот се одржа во Минхен, пред 700 гости од политиката, индустријата и медиумите.
Sono Sion може да се купи заедно со батериите или да се плаќа за месечно користење
Sono Motors нуди електричен автомобил што е достапен за сите. Sono Sion располага со досег од 250 километри, а цената му изнесува 16.000 евра. Во неа, сепак, не се вклучени батерите. Постојат две опции. Батериите да се купат по цена од околу 4.000 евра или на производителот да му се плаќа месечна рата за нивното користење.
Особеноста на Sion е можноста за самостојно полнење на батериите, именувана viSono. Тоа треба да асоцира на „визија“. Во покривот на возилото се вградени 300 соларни ќелии. Под поволни услови, овие ќелии можат за еден ден да ги наполнат батериите со енергија доволна за 30 километри. Соларните ќелии отстрана не треба да предизвикуваат забуна. Според производителот, тие можат и дифузната светлина ноќе да ја претвораат во струја, на пример од уличното осветлување или од околните куќи.
Батериите може да се користат и за приклучување надворешни потрошувачи
Втората специјалност на соларо-електромобилот е таканаречениот систем biSono. Батериите во возилото, имено, испорачуваат енергија за погонскиот електромотор, но можат да се користат и за испорачување струја за надворешни потрошувачи. На тој начин возилото се претвора во еден вид подвижен акумулатор. Со излезна моќ од 6,6 киловати, Sono Sion може да послужи и како полнач за струја за друг електромобил.
Производителот очекува неговото возило да наиде на прифатеност во подрачјето на заедничко користење на автомобилите, односно во таканаречениот „car-sharing“. Од тие причини, Sion стандардно поседува компатибилност со три различни понудувачи на услуги за „споделување“: powerSharing, carSharing und rideSharing.
Преку овие услуги може на пример да се поканат патници во возилото или енергијата во батериите да се понуди за користење, додека истото мирува. Покрај тоа, сопственикот на Sion може и да го изнајмува возилото за одреден надомест.
Here is our brand new design of the SION. A solarcar for everyone with integrated solarpannels, a range of 250 km and a price of 16.000€
Posted by Sono Motors on Friday, July 28, 2017
Во следниот период Sono Motors ќе посети повеќе европски држави и на потенцијалните клиенти ќе им понуди можност за пробно возење на Sion. Прво следи турнеја во 12 градови во 6 држави, чијшто почеток е закажан за 18-ти август во Минхен.