Во Базел започна со работа првата јавно достапна пумпа за точење водород. Компанијата воедно го обнови и возниот парк со првиот камион со приколка со погон на водород во светот, како и со уште 12 патнички возила што го користат ова „гориво“ на иднината.
Компанијата Coop ја отвори првата пумпа за точење водород во Швајцарија, којашто е достапна за јавноста. Пумпата се наоѓа во градот Хунзеншвил и се снабдува со „погонскиот“ водород од блиската хидроцентрала во Арау, кадешто се произведува од фирмата H2 Energy AG без каква било емисија на штетни материи.
Coop истовремено го комплетираше и сопствениот возен парк со првиот камион со приколка во светот што користи водород како погонско гориво, како и со уште дванаесет службени автомобили, исто така со погон на водород. Компанијата од Базел најавува скорешно отворање на нови станици за водород во земјата.
Der erste offizielle Tankvorgang an der Coop #Wasserstoff-Tankstelle. #CoopPräsentiert pic.twitter.com/m8ljAfF2a1
— coop_ch (@coop_ch) November 4, 2016
Секојдневието со автомобилите со погон на водород се разликува незначително од возилата со обичен погон. Времетраењето на полнењето, досегот со еден резервоар, како и оперативните трошоци по изминат километар се речиси идентични. Најголемата и најсуштинска разлика е во тоа што погонот на водород работи без каква било емисија на штетни материи. Од издувната цевка излегува совршено чиста вода.
„Сакаме нашите деца да не знаат што е тоа бензин“
Водородот се произведува во хидроцентралата по пат на електролиза. Со користење на енергијата од хидроцентралата, водата се разложува на водород и кислород. Електролизата се врши првенствено во периодите кога оптоварувањето на струјната мрежа е најниско. При производството на водородот не се испушта ниту грам штетни материи.
Coop е компанија за трговија на мало и во последните 25 години се залага за еколошки решенија. Отворањето на станицата за водород е дел од долгорочниот проект „Дела место зборови“ и воедно 326-ти чекор во реализацијата на истиот. Пратечкиот слоган на отворањето на водородната станица гласи соодветно: „Сакаме нашите деца да не знаат што е тоа бензин.“