Nissan подготви специјална серија од пикапот Navara под името Off-Roader AT32. Кратенката AT доаѓа од исландскиот специјалист за теренски возила Arctic Trucks, којшто го зголеми растојанието од подлогата на 24,3 сантиметри. Со тоа значително се подобрија и аголот на пристап од 35 степени, односно аголот на излез од 25 степени. За тракцијата се грижат тркала од 32 инчи, на којашто се однесува бројката во дополнителната ознака.
Секој примерок од специјалната серија располага со резервно тркало во полна големина, како и со масивна заштита на моторот, менувачот и резервоарот за гориво. Стандарднатата заштита на праговите е заменета со робусни штитници. Преработката е заокружена со амблеми AT32 на задниот капак и на предните крила.
Како основна изведба служи верзијата на Navara со двојна кабина и со ниво на опрема Tekna. Специјалниот модел се нуди во веќе готова изведба и како кит за преработка. Вторава опција чини околу 6.500 евра на поголемите пазари во Европа.