Марката со дивата мачка повеќепати ги има напаѓано премиум лимузините со спортски карактер од германското трио Audi A4, BMW серија 3 и Mercedes C-Class. Но, сега станува сериозно.
По цените што Jaguar ги одреди за новата спортска лимузина од средната класа се препознава најдобро какви намери има британската марка со својот XE. Неговата цена на европскиот пазар е малку пониска од Mercedes, на исто рамниште со BMW и малку повисока од Audi. Но, од друга страна, Jaguar не се купува затоа што е поевтин, туку затоа што е поразличен.
Дури и формата на каросеријата не остава простор за сомнеж дека единствената мисија на овој автомобил е напад за преземање на врвот во класата. Главниот дизајнер и ѕвезда на сцената, Јан Калум, внесоа многубројни елементи од спортското купе F-Type. Долгата хауба, заедно со грпката, широкиот појас и кабината повлечена наназад се најпрепознатливите знаци на првиот модел од средната класа во новото сметање на времето во Jaguar. Сликата ја заокружуваат типичната муцка на Jaguar, заедно со концентрираниот и речиси агресивен поглед во тенките светла – така се комплетира претставата за автомобил од марката што носи генетски код на победник.
Најмоќната верзија располага со компресорски 340 КС – засега
Најбрз ловец во семејството е XE S со шестцилиндарски мотор со компресорско натполнење и 340 КС, со вртежен момент од 450 њутнметри и спринт до сто за 5,1 секунди. Цената на овој модел на германскиот пазар изнесува 54.600 евра. Кој сака, може да добие и чисто штедлива машина, со дволитарски дизел со 163 КС, спринт за 8,4 секунди и потрошувачка од 3,8 литри дизел на сто километри. Во верзијата со шестстепен мануелен менувач, XE чини 36.500 евра.
Единствено дизелите со 163 и 180 КС се испорачуваат со мануелен менувач, додека сите други моделски варијанти доаѓаат стандардно со осумстепен автоматик. Понудата од мотори ја комплетираат два бензинца со турбонатполнење и моќност од 200, односно 240 КС. Според фабричките податоци, потрошувачката на овие два мотора изнесува 7,1 литри бензин на сто километри.
Новата генерација мотори од сопствен развој се докажа со штедливоста, но за тоа е заслужен уште еден момент. Три четвртини од каросеријата се изработени од алуминиум. Примената на лесниот материјал е едно од конструкциските начела во моделите на Jaguar, па не случајно британската марка важи како предводник во браншата во тој поглед. Голата каросерија тежи само 251 килограм, односно XE во најлесната верзија со дволитарски бензинец покажува на вага само 1.475 килограми. Најтешката верзија со шестцилиндарец доаѓа до само 1.665 килограми. Последниот пресуден фактор за штедливоста е аеродинамиката. Каросеријата има коефициент на отпор на воздух 0,26.
Оваа комбинација од нова генерација на мотори, паметни автоматски менувачи и електромеханичко сервоуправување, заедно со лесната каросерија и со подвозјето што влече многу заеднички компоненти од F-Type, вклучувајќи задна оска со две триаголни водилки, придонесува за врвната управливост на XE. Според пазарните стратези на британската марка, верзиите со дизел мотор ќе бидат најпродавани во гамата на моделот од средната класа. Каросериска верзија комби нема да се нуди во наследникот на неславниот X-Type. Купувачите што сакаат повеќе простор во кабината ќе мораат да го почекаат компактниот кросовер F-Pace.
Досегашните сопственици на автомобил со знак на Jaguar ќе се чувствуваат пријатно и во позната средина зад воланот. Материјалите во кабината оддаваат впечаток за квалитет, а амбиентот оддава спортска и воедно луксузна нота. Ова чувство се интензивира при изборот на некоја од опционалните бои за кабината, место обичната сиво-црна комбинација. Малечкиот волан со дебел обрач е неизоставен дел од Jaguar, исто како и ротацискиот контролер за автоматскиот менувач. Единственото разочарување следи кога тврдата пластика на страниците на средишната конзола ќе почне да крцка во брзо извозени свијоци. Деловите од облогите во кабината што се надвор од видното поле исто така можело да бидат изработени од поквалитетен материјал. Тоа сепак не смее да се случи кај автомобил што стреми кон премиум сегментот.
Ласерски проекциски дисплеј и стереокамера за 3D приказ
Британската лимузина надоместува за тоа со напредните системи за асистенција, од типот на ласерски проекциски дисплеј или „контрола на прогрес на секаква подлога“, кај моделите со автоматски менувач. Задача на вториов систем е да ја контролира тракцијата на замрзната подлога, без интервенција на возачот, до брзини од 30 километри на час. Импресивно работи и стереокамерата за тридимензионален приказ на подрачјето пред автомобилот.
XE поставува високи стандарди и во поглед на мултимедиските системи, користењето на услугите на интернет, како и поврзувањето со преносни уреди што работат на iOS или на Android. За тоа се користи технолошкиот пакет доставен од гигантот Bosch, со богата низа можности. Накусо, сé што умее паметниот телефон, умее и XE, па дури и малку повеќе од тоа.
Досега, XE се држи рамо до рамо со германските конкуренти од премиум сегментот. Но, што му недостига? За тоа најдобро ќе посведочат патниците на задната клупа. Задните врати имаат тесен изрез, а и покривот е доста низок. Но, ниту конкурентите не се многу подобри во просторната понуда. Тоа е данок на „брзата“ линија на каросеријата, со покрив што елегантно се спушта наназад. Од друга страна, тој што се решава за Jaguar, сигурно нема да седи на задната клупа.
Технички податоци Jaguar XE 2.0 Diesel 180 КС Automatic
Должина x ширина x висина (во m): 4,67 x 1,97 x 1,42
Меѓуоскино растојание (m): 2,84
Мотор: R4 дизел, 1999 ccm, турбо, директно впрскување
Моќност: 180 КС при 4000 врт/min
Вртежен момент: 430 Nm од 1750 – 2000 врт/min
Крајна брзина: 228 km/h
0 до 100 km/h: 7,8 s
Просечна потрошувачка: 4,2 литри
Емисија на CO2: 179 g/km (Euro 6)
Празно возило / Носивост: 1565 kg / 545 kg
Багажник 455 литри, со соборена клупа 830 литри
Круг на вртење: 11,7 m
Цена (во Германија): 44 500 евра
Технички податоци Jaguar XE S
Должина x ширина x висина (во m): 4,67 x 1,97 x 1,42
Меѓуоскино растојание (m): 2,84
Мотор: R6 бензински, 2998 ccm, компресор
Моќност 340 КС при 6500 врт/min
Вртежен момент: 450 Nm при 4500 врт/min
Крајна брзина: 250 km/h (ограничена)
0 до 100 km/h: 5,1 ѕ
Просечна потрошувачка: 8,1 литри
Емисија на CO2: 194 g/km (Euro 6)
Празно возило / Носивост: 1655 kg / 445 kg
Багажник 455 литри, со соборена клупа 830 литри
Круг на вртење: 11,7 m
Цена (во Германија): 54 600 евра