Дарко Јаконов
Американците повторно им објавуваат војна на RS7 и M5, но овојпат се многу посериозни во своите намери. CTS-V има 640 КС и ќе доживее премиера во јануари на салонот во Детроит.
Марката Cadillac упорно опстојува во својата идеја да се врати во избраното друштво на премиум марки, покрај Audi и BMW. Секој нов обид во таа насока е посилен и посериозен. Спортската изведба на новиот Cadillac CTS-V ги победува конкурентите BMW M5 и Audi RS7 во сите релевантни критериуми. Лимузината со мотор на суперспортски автомобил ќе доживее премиера во средината на јануари, на салонот во Детроит.
Моторот не може да биде друго освен V8, со раскошна работна зафатнина од 6,2 литри. Тој добива дополнителна поддршка од компресорско натполнење, коешто сега пумпа 640 КС и вртежен момент од 855 њутнметри. Со осумстепениот автоматик може да се ракува и преку рачките на воланот, и според ветувањата на американските инженери, се одликува со исклучително брзо менување на степените. Со тежина од 1.880 килограми, Cadillac забрзува до 60 милји на час (96 km/h) за 3,7 секунди, а крајната брзина изнесува 323 km/h. За задните тркала сигурно да ја пренесуваат бруталната моќ врз асфалтот, се користи електронски управувана блокада на диференцијал.
http://bcove.me/l1xkfck4
Други повпечатливи детали се хаубата од ламинат од карбонски влакна, електронска регулација на амортизерите, систем за соприање Brembo со шестклипни клешти и дискови со пречник од 390 милиметри напред и 365 назад. Будноста на нонтролата на стабилноста може да се регулира во четири степени. Бандажите од 19 инчи носат гуми со димензија 265/35 напред и 295/30 назад.
Внатрешноста пречекува со кожени седишта од Recaro, со електрично дотерување и средишен дел од превртена кожа. Спортската опрема ја дополнуваат спортски волан, проекциски дисплеј, можност за индивидуално местење на приказот на таблата со инструменти, озвучување Bose, мултимедиски систем со говорна команда и пристап на интернет. Со доплата е достапен комплет спојлери од карбон. Цените за американскиот пазар ќе бидат објавени на салонот во Детроит.
