Храбрите ги следи среќата, вели една поговорка. Nissan го погоди вистинскиот момент да го пушти електричниот Leaf во серија и денес продажбата на електромобилот расте од месец во месец.
Nissan Leaf продолжува со одличните продажни бројки. Од стартот на првата генерација на моделот во декември 2010 година, досега се продадоа преку 135.000 примероци од пионерскиот автомобил со електричен погон. Во меѓувреме, за најпродаваниот електричен автомобил на светот почнува да се интересира и европскиот пазар. Само во септември, во Европа се продадоа 1.986 примероци од Leaf, што е втор најдобар месец од почетокот на продажбата.
Одлични резултати постигнува продажбата во Велика Британија, со 851 возило во септември и зголемување од 156 проценти во споредба со ланскиот септември. Тоа е воедно и највисока продажба постигната во еден месец на европскиот пазар. Nissan Leaf се продава во двапати повеќе примероци од сите други електрични автомобили заедно. Во Велика Британија веќе 80 проценти од мрежата од автопатишта е покриена со брзи полначи за струја, а залет зема и Германија. Сите возачи на електрични автомобили, без разлика на марката, можат да ги користат полначите на Nissan. Бесплатно. Во меѓувреме, електричниот Leaf ја почна и службата како такси возило на улиците во Рим.